Samburuko erreserba nazionala Kenyako iparraldeko eremu babestua da. Autoz, Kenyako hiriburutik (Nairobi) 6 ordutara dago. Erreserbaren topografiak denetarik erakusten du: ibaiertzeko baso oparoak, sabana ireki eta lehorra, edota mendi aldapatsuak. Ewaso Nyiro ibaiak erreserbaren hegoaldeko muga ezartzen du eta eremu honen bizigarria da: jendearentzako, landareentzako eta animalientzako ura hortik dator.

Samburuko sabana lehor eta beroan, erliebe aldapatsuan eta hurbileko ibaian, animalia asko bizi dira. Otsaila eta martxoa dira urteko hilabete beroenak eta, ondoren, bi euri-sasoi datoz. Paisaia idor hartan dunetako palmondo-zuhaiztiak sakabanatzen dira eta, urrutitik, Koitogor eta Ololokwe mendien siluetak ikus daitezke.

Elefanteak, lehoinabarrak, lehoiak, jirafak eta 450 hegazti espezie baino gehiago ikustera etortzen dira bisitariak Samburura. Eremu honetan bakarrik aurki daitezkeen Grevy zebrek marra finak, tamaina handiko belarri biribilak eta gorputz handi bereizgarriak dituzte. Safaria egitean, Somaliako ostruka, Niloko krokodiloak eta orix talde handiak ikus ditzakezu; animalia guzti horiek basamortura egokituta daude eta halako inguru beroak nahiago dituzte. Arakatu tokia.

Samburu ezaguna da mundu osoan haren elefante-populazioa hain ondo aztertzeagatik. Ikerketak 20 urteko ondarea utzi duenez, bertako elefanteak fidakorrak dira oso eta ibilgailuetara gerturatzen dira, bereziki, Save the Elephants erakundearen ikerketa-kamioira. Elefanteek espazio-memoria aparta dute eta Samburuko erreserbaren mugak ezagutzen dituzte; izan ere, nabarmen lasaiago ibiltzen dira eremu babestuan daudenean. Arakatu tokia

Elefanteek eginkizun garrantzitsua dute inguru honetan paisaia-ingeniari gisa. Zuhaitzetako fruituak jatean eta haziak gorotzaren bidez zabaltzean, haziak barreiatzen laguntzen dute. Elefanteek zuhaitzei azala kentzen diete eta landareen hazkundea geldiarazten dute; ondorioz, beharrezko berpizkundea eragiten dute eta hazi-oinarria sakontzea ahalbidetzen dute. Lehorte-garaian beste animaliek ere erabiliko dituzten zuloak egiten dituzte ur bila. Elefanteek eragin handia dute paisaian.

Save the Elephants 1993an sortu zen elefanteen etorkizuna bermatzeko eta haiek bizi diren tokien osotasun ekologikoa mantentzeko. Nairobin egoitza duen STE erakundeak Afrika osoan lan egiten du elefanteak ulertzeko eta babesteko helburuarekin. Ikerketa-kanpamentu nagusia Samburun dago, non elefanteak lurrean, aske eta GPS jarraipenaren bidez kontrolatzen dituzten. Ikerketan oinarritzen dira plangintzaren eta politiken inguruko erabakiak hartzeko eta gizakiek elefanteekin duten harremana hobetzeko lan egiten dute. Arakatu tokia.

1960ko hamarkadan, Iain Douglas-Hamilton izeneko biologoak hasi zuen elefante basatien jokabideari buruzko lehen ikerketa Tanzanian, elefanteak kontrolatzeko eta zenbatzeko hegazkin arin bat erabilita. 1993an Save the Elephants sortu zuen, eta azkar asko aukeratu zituen Samburuko elefante mantso eta fidakorrak epe luzerako elefante-azterketa berri baterako. Samburun egindako ikerketak elefanteak mehatxatuta bizi direla ulertarazi dio munduari eta espeziearen etorkizuna bermatzeko soluzioak sortu ditu.

Save the Elephants erakundeak ez ditu airetiko ikerketak bakarrik egiten; horrez gain, banako elefanteen segimendua egiten du GPS lepokoen bidez. Elefanteei lasaigarri bat eman ondoren, albaitariek lepoko bat jartzen diete haien kokapena kontrolatzeko. Datu horiei esker, ikertzaileek animaliak nola mugitzen diren aztertu, eta elefante zehatzen bizitzen jarraipena egin dezakete. GPS datuak aztertzean, gainera, Save the Elephants erakundeak gelditasun-alerta automatikoak jaso ditzake elefante baten mugimendua eteten denean. Orain arte, STE erakundeak Afrika osoko 266 elefanteri jarri dizkie lepokoak.

Save the Elephants erakundeak datu kopuru handiak biltzen zituen elefanteen GPS lepokoetatik, baina datuak ikusteko modua falta zitzaien. 2006an, lepokoetatik lortutako datuak Google Earth-en paisaia digital aberatsean gainjartzen hasi ziren, elefanteen mugimenduak hobeto kontrolatu ahal izateko. Egun, Google Earth motorraren potentzia informatikoa erabiltzen dute, 17 urtetan zehar, grabatutako 266 elefanteen bost milioi kokapenak aztertzeko.

Elefanteek, bidaiatzean, errepideekin, etxeekin, baserriekin eta jendearekin topo egiten dute maiz. Gizakien eta elefanteen arteko gatazka arazo larria da elefanteen babeserako, eta elefanteen segurtasuna bermatzeko modu bat elefanteei igarotze segurua eskaintzea da. Elefanteen jarraipen-datuetan oinarrituta, elefanteak zirkulazio handiko errepidearen azpitik salbu ibil zitezen eraiki zen lurpeko pasabidea. Arakatu tokia

Isilpeko ehiza da elefante afrikarren biziraupenerako mehatxu larriena. Elefanteak hortzetan duten bolia eskuratzeko hiltzen dituzte eta, ondoren, bolia mundu osoan saltzen dute. Elefante helduen hilketak eragin samingarria du familia-egituretan eta elefante kume asko zurtz uzten ditu. Isilpeko ehizari aurre egiteko, ehiztariak geldiarazteko zigor zorrotzak ezartzeaz gain, bolizko produktuen eskaria murriztu behar da.

Elefante baten heriotza galera kulturala da Samburuko jendearentzat. Isilpeko ehizak ezegonkortasuna ekartzen du elefanteen ondoan bizi direnen bizitzetara, legez kontrako ehiztariak harat-honat ibiltzen baitira boliaren bila. Northern Rangelands Trust bertako jendea kontratatzen ari da kontserbazio-lanetarako, lurra kontserbazio-eremu bihurtzen eta turismoaren bidez aukera ekonomikoak sortzen; horrez gain, Samburun elefanteek duten balioa erakusten dute.

Basozainak isilpeko ehizaren aurkako gerraren lubakietan daude, eta haien bizitzak arriskuan jartzen dituzte Kenyako elefanteak defendatzeko. Bertako jendeak eta erakundeek ematen dizkieten aholkuei jarraituta, inguruak arakatzen dituzte txakur trebatuen laguntzaz legez kontrako jardueren bila. Lewa Wildlife Conservancy eta Kenya Wildlife Service erakundeen lan sarituari esker, Kenyako iparraldean isilpeko ehiztariek hildako elefante kopurua populazio osoaren % 1era murriztu da: sekulako garaipena elefanteak defendatzeko bataila neketsuan.

Isilpeko ehiztariek elefante bat hiltzen dutenean, zer gertatzen da haren kumeekin? 1977an sortu zen David Sheldrick Wildlife Trust erakundeak animalia behartsuak laguntzen ditu, zurtzak barne. Nairobin duten elefante zurtzentzako etxean, zaindariak elefanteen elikaduraz, ariketa fisikoaz eta talde-sozializazioaz arduratzen dira. Aipatutako zainketa funtsezkoa da gero aske bizitzeko gai diren elefante osasuntsuak hazteko. Sheldrick Trust erakundeak 180 elefante kume baino gehiago hazi ditu. Arakatu tokia

2012an, STE erakundeak Street View Trekker Samburura eramateko eskatu zuen, elefante askeen 360 graduko irudi panoramikoak eskuratzeko. Edonork ezin dezake Samburu bisitatu, baina edonork egin dezake Internet bidezko safari bat elefante hauek ezagutzeko. Elefanteak sarean denon eskura jarrita, ikertzaileek eta defendatzaileek espero dute jendeak elefanteekin konexio estuagoa eta haien etorkizuna bermatzeko lanean konprometitzeko gogoa izatea.